德國今屆世盃首戰以7比1大勝庫拉索，歷屆累積總入球達到239球，以1球優勢超越巴西，成為世盃決賽周史上最多入波球隊。與此同時，踏入21世紀以來，世盃有5場出現單一球隊入波「7+」，德國獨佔3席，包括2014年4強以7比1大炒巴西。
德國專門製造「大屠殺」，2002年世盃首場分組賽以8比0狂勝沙特阿拉伯，同今屆有異曲同工之妙，該屆打入決賽，但0比2不敵有朗拿度起孖嘅巴西。
最令人震驚係2014年4強德國大數主辦國巴西7比1，勇闖決賽加時擊敗阿根廷，第4度捧盃。換言之，德國過去2次出現世盃單場入波「7+」，最終都進身決賽，今場贏庫拉索7比1可以話吉兆。
另外，德國門將紐亞今仗擔任正選， 以40歲零79日打破馬圖斯紀錄(39歲零91日)，成為「日耳曼兵團」史上喺大賽決賽周(世盃及歐國盃)最大年齡上陣球員。
免費玩Game、砌最強11人，一鍵share畀FD子打牙骹：